11-Dec-2025
ڈائریکٹر جنرل کے ڈی اے آصف جان صدیقی کا کے ڈی اے سوک سینٹر کے اہم شعبہ جات کا اچانک دورہ سائلین سے ملاقات، فوری احکامات اور ریکارڈ سیکیورٹی پر اظہارِ اطمینان
ڈائریکٹر جنرل ادارہ ترقیات کراچی آصف جان صدیقی نے کے ڈی اے سوک سینٹر میں واقع محکمہ لینڈ، محکمہ اسٹیٹ اینڈ انفورسمنٹ اور ریکارڈ روم کا اچانک دورہ کیا۔ دورے کا مقصد عوامی خدمات کے معیار کا جائزہ لینا، شہریوں کے مسائل کو براہِ راست سننا اور انتظامی امور کی بہتری کے لیے ہدایات جاری کرنا تھا۔دورے کے دوران ڈی جی کے ڈی اے نے محکمہ لینڈ میں موجود شہریوں سے ملاقات کی اور ان سے ان کے زیرِ التواء لینڈ کے معاملات، درپیش مشکلات اور عملے کے رویے سے متعلق سوالات کیے۔ شہریوں نے اپنے مسائل سے آگاہ کیا جن پر ڈی جی نے موقع پر ہی متعلقہ افسران کو فوری حل کے احکامات جاری کیے۔ انہوں نے واضح ہدایات دیں کہ عوامی سہولت کے لیے لینڈ سے متعلق تمام کارروائیاں شفاف، تیز رفتار اور میرٹ پر کی جائیں۔بعد ازاں محکمہ اسٹیٹ اینڈ انفورسمنٹ میں افسران سے ملاقات کے دوران ڈی جی کے ڈی اے نے شہر بھر میں غیر قانونی تعمیرات اور تجاوزات کے خلاف جاری کارروائیوں کا تفصیلی جائزہ لیا۔ انہوں نے ہدایت کی کہ تجاوزات کے خلاف مہم بلا امتیاز جاری رکھی جائے اور شہر کی سرکاری اراضی کو ہر صورت غیر قانونی قبضوں سے پاک رکھا جائے۔آخر میں ریکارڈ روم کے دورے کے دوران ڈائریکٹر جنرل کے ڈی اے آصف جان صدیقی نے شہریوں کے محفوظ ریکارڈ کا تفصیلی جائزہ لیا اور ریکارڈ کی حفاظت، ترتیب کے عمل پر اطمینان کا اظہار کیا۔ انہوں نے ریکارڈ کی بہتر دیکھ بھال کرنے والے عملے کی کارکردگی کو سراہا اور کہا کہ شہریوں کا محفوظ ریکارڈ ادارے کا قیمتی اثاثہ ہے جس کی حفاظت اولین ترجیح ہے۔ڈائریکٹر جنرل کے ڈی اے نے تمام شعبہ جات کے افسران کو تاکید کی کہ وہ عوامی خدمت کو اپنا مشن سمجھیں، دفاتر میں نظم و ضبط برقرار رکھیں اور لوگوں کے جائز مسائل کے حل میں کوئی تاخیر نہ کریں، دورے کے دوران ممبر ایڈمن شکیل صدیقی، سینئرڈائریکٹر لینڈجمیل احمد، ڈائریکٹر لینڈ مراد عباسی، ڈائریکٹر اسٹیٹ اینڈ انفورنسمنٹ محمد معراج موجود تھے۔